Workshop to go Eise "Workshop to go" ass e Raumsystem, wou ee 6 Aarbechtsplazen einfach a 3 Normkëschte ka raumen. D'Material léisst sech nom Gebrauch einfach an engem Schaf verstauen, an déi eenzel Këschte sinn net ze schwéier. D'Aarbechtsplaze kënnen un enger Schülerbänk oder engem einfachen Dësch festgemaach ginn, fir sécher mam Geschier ze schaffen, a fir d'Bänk oder den Dësch ze schützen. Wann ee méi Aarbechtsplaze brauch, kann een dat natierlech erweideren. Esou loossen sech zum Beispill 12 Aarbechtsplazen einfach a 6 Normkëschten op engem Weenchen transportéieren.

Bei eis kënnt de "Workshop to go" zum Beispill an den Asaz, wa mir zesumme mat der Naturschoul d'Spiller am Waassergaart ubidden. An engem vun den Atelieren bauen d'Schüler e klengt Loftballonboot. Dofir mussen si seeë, feilen a schläifen.

An déi éischt Normkëscht passe 6 Aarbechtsplazen, de Kär vun eisem "Workshop to go". All Aarbechtsplaz ka mat 2 Schraufzwénge sécher un der Bänk festgemaach ginn. Do drop gëtt entweder eng Gehrungslade oder e klengen Dësch fir mat der Lafsee ze schaffe geschrauft. Oder et kann een e Stéck Holz direkt mat enger zousätzlecher Schraufzwéng op der Aarbechtsplaz fixéiere fir drun ze schaffen. Wann ee fäerdeg ass, ginn d'Gehrungslade, de Lafsee-Dësch, d'Schrauwen an déi zwou Schraufzwéngen an der Aarbechtsplaz verstaut.

An déi zweet Normkëscht passe 6 Schräinerseeën, 6 Himmer, 6 zousätzlech Schraufzwéngen, 6 Metall-Linealer a 6 PUK-Seeën. A fräie Fächer kënnen z.B. Bläistëfter a Gummie geraumt ginn. Jee no Aktivitéit muss net all Plateau ausgepaakt ginn, a beim Raume gesäit een direkt, op all d'Geschier erëm op senger Plaz ass.

 An déi drëtt Normkëscht passe 6 Lafseeën, 6 Metallwénkelen, 6 Tübe Päsch, a ganz wichteg .... Ersatzseeblieder ;-)

Wien interesséiert ass de "Workshop to go" nozebauen fënnt hei d'Pläng mat de Moossen. Mir géifen eis iwwer e Feedback freeën.
Op Ufro kënne mir och gär d'Pläng als DXF zur Verfügung stellen.